Nëse pas kolposkopisë dhe biopsisë rezulton se keni ndryshime qelizore të shkallës së lartë (si CIN 2 ose CIN 3), mjeku mund t’ju rekomandojë procedurën LEEP (Loop Electrosurgical Excision Procedure). Ky është një hap vendimtar për të parandaluar zhvillimin e kancerit të qafës së mitrës.
Çfarë është procedura LEEP?
LEEP përdor një lak të hollë teli, nëpër të cilin kalon rrymë elektrike, për të hequr indin e dëmtuar nga qafa e mitrës. Kjo procedurë:
- Mbyll enët e gjakut në të njëjtën kohë, duke minimizuar gjakderdhjen.
- Ruan indin e shëndetshëm përreth, duke mbrojtur funksionin riprodhues.
Si kryhet dhe a është e dhimbshme?
Procedura zgjat rreth 10-20 minuta. Për të siguruar rehatinë maksimale të pacientes dhe për të shmangur çdo ndjesi shqetësimi, LEEP zakonisht kryhet me anestezi sedacion (një gjumë i lehtë dhe i shkurtër). Kjo i lejon mjekut të punojë me saktësi dhe pacientes të mos ndjejë asnjë dhimbje apo ankth gjatë procesit.
Analiza e kufijve: Pse është e rëndësishme?
Indi i hequr gjatë LEEP dërgohet në laborator për një analizë të detajuar histopatologjike. Një nga pikat më kryesore të këtij raporti është kontrolli i kufijve të prerjes:
- Kufij të lirë: Do të thotë se e gjithë zona me qeliza të ndryshuara është hequr plotësisht.
- Kufij të prekur: Nëse rezulton se qelizat e ndryshuara arrijnë deri në skajet e indit të hequr, kjo mund të diktojë nevojën për të hequr edhe një pjesë tjetër të vogël për të garantuar pastrimin e plotë të zonës.
Kujdesi dhe rikuperimi: Çfarë të presim?
Shumica e grave i kthehen aktiviteteve normale brenda 1-2 ditëve, por procesi i shërimit të brendshëm kërkon kohë:
- Gjakderdhja “e vonuar”: Është shumë normale që rreth dy javë pas procedurës të keni një episod gjakderdhjeje. Kjo ndodh për shkak të rënies së koaguleve (zgjebeve) që janë krijuar gjatë procesit të shërimit në qafën e mitrës. Mos u shqetësoni, kjo është pjesë e natyrshme e rikuperimit.
- Kufizimet: Shmangni marrëdhëniet seksuale, tamponët dhe aktivitetet fizike të rënda për rreth 4 javë.
- Rikontrolli: Ndjekja me Pap-test pas 6 muajsh është e domosdoshme.