Fizioterapia e dyshemesë pelvike tek gratë – Kur rekomandohet dhe si zhvillohet trajtimi

Çfarë është fizioterapia e dyshemesë pelvike?

Fizioterapia e dyshemesë pelvike është një fushë e specializuar e fizioterapisë që merret me vlerësimin dhe trajtimin e muskujve që mbështesin organet pelvike tek gratë, përfshirë fshikëzën urinare, mitrën dhe rektumin.

Këta muskuj luajnë rol thelbësor në kontrollin e urinimit, funksionin seksual dhe stabilitetin e legenit. Çrregullimet e tonusit të tyre – qoftë dobësim (hipotonus) apo tension i shtuar (hipertonus) – mund të ndikojnë ndjeshëm në cilësinë e jetës.

Fizioterapia e dyshemesë pelvike synon rikthimin e funksionit normal përmes një programi të strukturuar rehabilitimi.

Kur rekomandohet rehabilitimi i dyshemesë pelvike?

Rehabilitimi i dyshemesë pelvike rekomandohet në rastet e:

– Inkontinencës urinare (rrjedhje e pavullnetshme e urinës)
– Urgjencës urinare dhe urinimit të shpeshtë
– Prolapsit të organeve pelvike
– Dhimbjes në zonën pelvike
– Dhimbjes gjatë marrëdhënieve seksuale
– Vaginismus
– Vulvodinia
– Problemeve pas lindjes
– Ndjesisë së dobësisë ose rëndesës në legen

Shumë gra mendojnë se këto probleme janë “normale” pas lindjes ose me kalimin e moshës. Megjithatë, në shumicën e rasteve ekziston një zgjidhje efektive përmes fizioterapisë së specializuar.

.

Si zhvillohet seanca e parë?

Seanca e parë fillon me një vlerësim të detajuar klinik, pas konsultës gjinekologjike.

Diskutohen shqetësimet aktuale, historia mjekësore, stili i jetesës dhe objektivat individuale të trajtimit. Edukimi mbi anatominë dhe funksionin e muskujve pelvikë është pjesë thelbësore e këtij procesi, pasi kuptimi i trupit ndihmon në aktivizimin korrekt të muskujve.

Më pas realizohet një vlerësim funksional që përfshin posturën, frymëmarrjen dhe analizën e forcës, tonusit dhe koordinimit të muskujve pelvikë.

Bazuar në këtë vlerësim, hartohet një plan trajtimi i personalizuar.

Si realizohet trajtimi i dyshemesë pelvike?

Trajtimi i dyshemesë pelvike bazohet në një qasje gjithëpërfshirëse dhe të individualizuar.

Programi mund të përfshijë ushtrime të tipit Kegel, të cilat ndihmojnë në përmirësimin e forcës, tonusit dhe kontrollit të muskujve pelvikë.

Në rastet me tension të shtuar muskulor, aplikohen teknika manuale për lirimin e tensionit dhe përmirësimin e koordinimit.

Kur është e nevojshme, përdoret biofeedback, një metodë që vizualizon aktivitetin muskulor përmes sensorëve dhe ndihmon në kontrollin më të saktë të muskujve.

Në situatat kur muskujt e perineumit nuk mund të aktivizohen në mënyrë efektive, mund të aplikohet elektrostimulim për aktivizim pasiv dhe rikthim gradual të funksionit.

Edukimi mbi përdorimin korrekt të muskujve gjatë aktiviteteve të përditshme dhe koordinimi me frymëmarrjen janë pjesë integrale e rehabilitimit.

Trajtimi zhvillohet në kuadër multidisiplinar, në bashkëpunim me gjinekologun, për të garantuar siguri dhe efektivitet.

A është e sigurt fizioterapia e dyshemesë pelvike?

Fizioterapia e dyshemesë pelvike është një metodë jo-invazive dhe e sigurt kur realizohet nga profesionistë të trajnuar.

Programi përshtatet sipas gjendjes individuale dhe progresit të pacientes, duke respektuar gjithmonë komoditetin dhe sigurinë e saj.

Fizioterapia e dyshemesë pelvike është një zgjidhje efektive për shumë probleme që prekin shëndetin intim dhe funksional të gruas. Inkontinenca urinare, prolapsi pelvik apo dhimbjet gjatë marrëdhënieve seksuale nuk duhet të konsiderohen si gjendje që duhen “durur”.

Me vlerësim të duhur dhe rehabilitim të strukturuar, shumica e grave përjetojnë përmirësim të ndjeshëm të simptomave dhe cilësisë së jetës.

Suila Hasa

Fizioterapiste

0683097991